Fór til Akureyrar í dag vegna Bs verkefnisins. Fór aðallega til að sitja fund/ráðstefnu um samgöngumál en nýtti jafnframt ferðina til að hitta hafnarstjórann á Akureyri, tengiliðinn hjá Samherja og leiðbeinandann hjá HA.

Ráðstefnan var ágætt, fundirnir í morgun voru samt miklu betri og gerðu ferðina alveg þess virði. Það er svo margt furðulegt í gangi í flutningamálum á Íslandi, allt vegna þess að það er hagur Flytjanda og Landflutninga að halda flutningunum á vegunum. Flutningur á vegum er niðurgreiddur stórlega af þjóðfélaginu því stóru, þungu (allt að 49 tonn samtals) bílarnir slíta vegunum margfalt á við það sem þeir greiða til baka til ríksins í formi skatta.

Þegar samgönguyfirvöld athuga svo málið og senda fyrirspurnir til “hagsmunaaðila” þá lenda fyrirspurningar hjá Eimskip og Samskip sem sjóflutningafyrirtækjum og Eimskip/Flytjanda og Samskip/Landflutningum sem trukkafyrirtækjum. Hvernig haldið þið að svörin frá þessum aðilum, sem sitja beggja vegna borðsins, séu varðandi hagkvæmni strandsiglinga??

Svo þegar kemur að því að stytta þjóðveginn eða framkvæma einhverjar betrumbætur á vegakerfinu þá hafa sveitarfélögin orðið algjört dauða-tak á Vegagerðinni. Lagabreytingar voru gerðar 1994 og 2002 sem valda því að ef sveitarfélög eru ekki sátt við það sem Vegagerðin er að leggja til, eins og t.d. að stytta þjóðveg 1 um 15 km, með því að fara svokallað Svínavatnsleið en það færir veginn frá Blönduósi, þá geta sveitarfélögin á svæðinu svæft málið með því að hreinlega hafna nýju veglínunni og neita að setja hana inn á skipulag. Þannig er Vegagerðinni þröngvað til að viðhalda veginum sem þegar er til staðar (en ekki er farið í neinar endurbætur á honum). Svona geta sveitarfélögin þröngvað öllum vegfarendum til að keyra í gegnum Blönduós með þá von í brjósti að þeir stoppi og kaupi pylsu og kók.

Heildar viðskipti á Blönduósi vegna “pylsu og kók” sölu (eða það sem er afleitt af stoppi vegfarenda þar) eru tæpar 70 milljónir. Styttingin sem verið er að leggja til er einhver 4% á leiðinni. Norðlenska og Kjarnafæði eru að borga um 130 milljónir á ári í flutning á framleiðslu fyrirtækjanna til höfuðborgarsvæðisins. Ef miðað er við að gjaldskrá vöruflutninga lækkar um 4% þá lækkar reikningur þeirra um 5,2 milljónir. Ef tvö fyrirtæki geta sparað sér 5,2 milljónir á svona framkvæmd, hve mikið geta þá allir vegfarendur sem keyra þarna um sparað sér?? Meira en 70 milljónir? Já alveg pottþétt. En það er ekki hagur Blönduós. Hagur Blönduós er að fá 70 milljónir þó það kosti aðra 97 milljónir bara í útlögðum bensínkostnaði á ári, og þá á eftir að reikna annan kostnað (800 bílar á dag í 365 daga sem hver eyðir 11 lítrum á hundraðið).

Popularity: 20% [?]