Þá sér fyrir endann á byggingarferlinu á Freyjubrunni 24 í Úlfarárdal, eða Úlfarsfelli eða hverfinu við hliðina á Grafarholti eins og við Ösp erum farin að kalla hverfið. Við áttum að fá afhent skv. kauptilboði 1. mars en því var frestað í kaupsamning um einhverja daga og fáum því í síðasta lagi m.v. stöðuna í dag 10. mars nk.

Það eru bæði menn á okkar vegum og á vegum verktakans að vinna í húsinu þessa dagana, málarar að spartla veggina, píparar að tengja sturtur og innbyggða vatnskassa fyrir klósettin og í næstu viku verða málarar á okkar vegum sem byrja að mála loft og veggi og rafvirkjar sem tengja tengla og slökkvara. Í þar næstu viku fáum við (væntanlega) afhenta eldhúsinnréttingu ásamt innihurðum, þannig að allt er að smella.

Það sem við þurfum sjálf að gera er að leggja öll gólfefni og flísar á veggi í baðherbergjum. Og að sjálfsögðu að flytja. Við erum búin að pakka svona því sem hægt er að pakka í Álfkonuhvarfi; byrjuðum á bókum, efriskápum og geymslunni og erum búin með það. Þá eru stóru hlutirnir eftir og þeir sem við erum að nota dags daglega.

Planið er að komast inn í húsið 24. mars, eða amk að tæma Álfkonuhvarfið þann dag, þó við þurfum að sofa í íbúðinni hjá tengdó í Gullengi einhverjar nætur. Við áttum að skila af okkur Álfkonuhvarfinu 15. mars skv. kauptilboði, en fengum frest út mars í samningum. Það er þó óþarfi að níðast á kaupendum og nýta allan frestinn.

Ösp sendi mér eftirfarandi texta í SMS núna áðan:

Lovísa [kennarinn hans Frank] var ad hringja, frank og petur helgi stungu af ur skolanum og foldu sig, voru sendir til skolastjora en tad hafdi litil ahrif. Tad a ad hafa fund med foreldrum, kennara, honum ig skolastjor, sennilega midvikudag.

Veit ekki hvernig ég á að taka þessum skilaboðum. Ég fór aldrei til skólastjórans alla mína skólagöngu, en Frank byrjar strax í fyrsta bekk!

Það er ekki auðvelt að vera karl á djamminu. Sé miðað við þetta myndband amk. Þarna er hlutverkum karla og kvenna snúið við og karlar látnir ganga í gegnum þær þjáningar sem konur ganga vanalega í gegnum… af hendi karla.

Smellið á titil færslunnar til að sjá myndbandið.

Þegar ég stóð í Seljakirkju og beið eftir að Ösp kæmi með Leifa föður sínum, og þá tilvonandi tengdaföður mínum, fyrir 10 árum vissi ég ekki hvað framtíðin bæri í skauti sér. Framtíðin var óskrifað blað, þó við hefðum vissulega væntingar til hennar.

Framtíð sem nú er liðinn að hluta og sú framtíð hefur gefið okkur báðum mikið. Meðal annars tvo yndislega og ástríka stráka, þá Frank Gabríel og Almar Frey. (Ó)teljandi utanlandsferðir saman, og ennþá fleiri ferðalög innanlands. Eina íbúð sem við erum búin að búa í í 6 ár og eitt raðhús sem við fáum afhent í mars næstkomandi, og áætlum að búa næstu 20 árin.

Það hefur gengið á ýmsu á þessum 10 árum, með hæðum og lægðum. Barnsleysi hrjáði okkur fyrstu árin, en með hjálp lyfja tókst að búa Frank Gabríel til. Almar Freyr var aftur á móti meiri lukka og algjörlega óvænt sending, því við vorum farin að leggja drög að öðru barni þegar hann varð til. Þannig tengjast bæði hæðir og lægðir strákunum.

Við Ösp höfum bæði farið í gegnum háskólanám á þessum 10 árum. Þegar við giftum okkur vorum við aðeins Verslunarskólagengin, en erum núna útskrifaðir viðskiptafræðingar. Meira nám bíður seinni tíma.

Við Ösp lítum björtum augum til framtíðar á þessum tímamótum.

Það eru ár og dagar frá jafn harkalegum desember og janúar, bæði hvað færð og veður varðar, amk á höfuðborgarsvæðinu.

Minnir að snjómet frá 1984 hafi verið jafnað, með aðeins tvo daga sem voru með snjólausa jörð í Reykjavík í desember. Janúar er búin að vera jafn slæmur og desember, sennilega jafnvel verri.

Veðrið á landinu öllu var “arfavitlaust” í dag, allt meira og minna lokað, sbr kort frá vef Vegagerðarinnar, þar sem rautt merkir lokað/ófært.

Það er greinilegt að veðrið er verst alveg frá Hvolsvelli, vestur um land og alveg norður og austur á Raufarhöfn.

Við sendum okkar bestu jólakveður
með von um að jólahátíðin verði ánægjuleg.

Frank M., Ösp, Frank Gabríel & Almar Freyr

Núna þegar aðeins 4 dagar eru til jóla eru strákarnir á yfirsnúning af spenning fyrir jólunum.

Þeir eru búnir að telja niður dagana frá því í byrjun nóvember, Frank Gabríel með heimagerðu dagatali sem var með 15 reitum til að stimpla í. Sem betur fer hætti hann að stimpla eftir aðeins 6 daga þannig að jólin eru ekki alveg komin samkvæmt því dagatali. En hefðu verið komin um miðjan nóvember ef hann hefði stimplað daglega.

Desember er búin að vera annasamur mánuður bæði í Vatnsendaskóla og í Sólhvörfum. Þeir eru búnir að föndra skraut, syngja, leika og gera jólagjafir. Almar er alltaf að leiðrétta bróður sinn sem syngur jólalögin ekki alveg rétt, er búin að læra breyttar og aðeins fullorðinslegri útgáfur af jólalögunum. Sem dæmi þá syngur Frank alltaf “Jólasveinar ganga um gólf með geislasverð í hendi, móðir sópar gólf og flengir þá með sverði“, og þá segir Almar “Jank jú ejjjt að ynjga etta vitlaust”.

Jólagjafirnar komu heim í þessari viku, mikill spenningur hjá báðum og annar (Almar) vill opna hana strax, svo spenntur er hann. Þegar við spyrjum hvort að það megi opna gjöfina strax svarar hann að það eigi að gera það á jólunum. Efast um að hann viti hvað það þýðir, en gott að kennararnir í leikskólanum innprentuðu það í börnin.

Þeir fengu báðir tvö dagatöl, eitt súkkulaði dagatal frá ömmu Ingu og afa Frank, og eitt Lego Star Wars (Frank) og Playmo Riddara (Almar). Lego dagatalið kostaði helmingi meira en Playmo dagatalið, en innihaldið í Playmo er tvisvar sinnum veglegra en í Lego dagatalinu. Frank er eiginlega farin að öfunda Almar af öllu Playmo dótinu sem kemur úr hans dagatali.

Jólasveinarnir koma við á hverju kvöldi í gluggunum hjá þeim og gefur í skóinn. Það er mikill spenningur að sjá hvað er í skónum að morgni, svo mikill spenningur að það er vaknað fyrir allar aldir og kíkt í skóinn. Hafa strákarnir vakið hvorn annan við að hlaupa inn í herbergi hjá hinum að athuga hvað er í skónum hjá honum og hvort það sé flottara en það sem viðkomandi fékk. Jólasveinninn sem kemur í þessa glugga gefur yfirleitt það sama í báða skóna til að skapa ekki ósætti milli bræðranna.

Frank fór á litlu jólin í morgun í Vatnsendaskóla. Mikill spenningur fyrir því, en litlu jólin fengu falleinkunn hjá honum því það mætti bara alls engin jólasveinn. Það líkaði mínum manni ekki. Litlu jólin í leikskólanum hjá Almari voru fyrir viku síðan og þar mætti jólasveinn í fullum skrúða, við miklar vinsældir.

Það er semsagt nóg um að vera á þessu heimili fyrir jólin og mikill spenningur.

Það er merkilegt að eiga barn á fyrsta ári í grunnskóla. Það er eins og skólastjórnendur haldi að foreldrar barna eigi ótakmarkaða frídaga. Og þá á öðrum tíma en yfir sumarið.

Fyrst ber að nefna 2,5 mánaða sumarfrí. Það er frá ca 6. júní til 22. ágúst. Samtals ca 50 dagar.

Næst ber að nefna vetrarfrí. Bæði fyrir og eftir áramót eru þrír dagar, samtals sex.

Þá er komið að jólafríinu. Skólinn hjá Frank fer í frí eftir þriðjudag, en þá eru litlu jólin. Jólafríið er þá 9 virkir dagar.

Páskafrí er 3 virkir dagar.

Starfsdagarnir og foreldrafundir eru minna mál því þá er dægradvölin (pössun í skólanum) opin frá 8.10 til 17.00.

Ofantalið, að undanskildu sumarfríinu, starfsdögum og foreldrafundum, eru 18 virkir dagar sem foreldrar þurfa að taka sér frí eða redda pössun eftir öðrum leiðum. Samtals gera þetta ca 68 daga, með sumarfríi, en flest fólk sem er að vinna er með 24 til 30 daga í sumarfrí. Þá vantar 8 daga samt uppá, og þá er ekki gert ráð fyrir að hjón taki neina frídaga saman.

Í leikskólanum var þetta auðveldara. Eða þannig. Þar fer leikskólinn bara í 4 vikna sumarfrí og lokar yfir hásumarið, og er með svo ca 8-10 starfsdaga yfir veturinn.

Þetta er uppáhalds lagið mitt þessa dagana.

Það var aldeilis spenntur 6 ára strákur sem vaknaði í morgun á þessu heimili. Klukkan 5:30 nákvæmlega, svo spenntur var hann. Ástæðan fyrir spenningnum var sú að flokkurinn hans í HK átti að keppa í fótbolta við jafnaldra úr KR í Kórnum.

Við fórum öll af stað um klukkan 8.30 til að ná örugglega í Kórinn á réttum tíma. Þegar við komum í Kórinn var hópnum skipt á þrjá velli, og fóru 3 leikir samtímis fram.

Það er skemmst frá því að segja að Frank Gabríel og liðið hans vann fyrsta leikinn 2 – 1, og var það glæsilegur árangur miðað við ringulreiðina sem ríkti inni á vellinum. Öðrum leiknum tapaði liðið hans Franks svo 1-0, og var hann ekki alveg jafn sáttur við þau úrslit.

Meðfylgjandi eru nokkrar myndir frá leikjunum.